Dem BIO-Bauer säi ganze Stolz 

D'Vereenegung fir Biolandwirtschaft Lëtzebuerg a.s.b.l. organiséiert 2026 fir déi 4. Kéier d'BIO-Woch, mat der Ënnerstëtzung vum Ministère de l'Agriculture, de l'Alimentation et de la Viticulture souwéi vu villen Sponsoren. Ab dem 23. September, dem Europäeschen Dag vun der Biologescher Landwirtschaft, steet ganz Lëtzebuerg am Zeechen vum BIO-Landbau.

„Dem BIO-Bauer säi ganze Stolz“ ass och an dësem Joer de Slogan vun der Campagne.

D’BIO-Woch 2026 ass eng grouss Sensibiliséierungs-Campagne, déi sech dëst Joer op d’Produzenten an d‘Konsumente fokusséiert. D'Zil ass et, déi Mënsche sichtbar ze maachen, déi sech am Alldag fir d'BIO-Landwirtschaft asetzen, duerch hir Aarbecht oder hiren Akaaf.

Am Mëttelpunkt stinn aacht Botschafter, véier Produzenten a véier Konsumenten, déi hir Geschicht an hir Iwwerzeegung mat eis deelen.

Dorënner de Greg Colling, BIO-Bauer vum Karelshaff, d'BIO-Wënzer Mathieu an Nicolas Schmit-Fohl vum Domaine Schmit-Fohl, de BIO-Bauer Pol Fischbach vum Biohaff Fischbach, de BIO-Imker Marc Thiel, de Steve Lentz, Chef-Kach an der Hotelschoul, Kirsty von Boch, Food-Journalistin, de John Schlammes, Expert an Ayurveda a Yoga an Aurélie Wagener, Influencerin.

D'Campagne riicht sech u jiddereen, dee méi iwwer BIO-Liewensmëttel wësse wëll, wou se hierkommen, wéi se produzéiert ginn a wat BIO konkret heescht. 

Vum 23.-27. September gëtt et e Programm mat Kachcoursen, Workshops, Verköstigungen, a Portes Ouvertes bei de BIO-Betriber. Konsumente kënnen hannert d'Kulisse kucken, Produzente kenneléieren a selwer kache léieren. Et ginn och Ateliers an Informatiounsstänn ronderëm Theme wéi Ernärung wärend der Schwangerschaft, mat der Spezialistin Maxi Pesch fir Kannerernährung, proposéiert.

Zousätzlech weise Feilschëlder an zwielef Gemengen de Wee zu de BIO-Betriber an ärer Noperschaft. A verschiddene Supermarchéë fannen d‘Konsumenten Feilschëlder mat Kilometerugaben zum nächsten BIO-Bauer an der Noperschaft. All Schëld ass mat engem QR-Code ergänzt a verlinkt esou op Informatiounen iwwert de jeeweilege Betrib.

Gitt Partner vun der BIO-Woch an ënnerstëtzt domat d’Lëtzebuerger Bio-Produzenten.